UNIMAS, UTM ngatur Program 1Ringgit 1Nation

KUCHING: Laban pengibuh enggau penyinu ati ke raban ti kurang benasip lebih agi peminta sedekah, Universiti Malaysia Sarawak (UNIMAS) enggau kerejasama Universiti Teknologi Malaysia (UTM)udah ngatur Program 1 Ringgit 1 Nation. Sapit Naib Chanselor Hal Ehwal Pelajar enggau Alumni UNIMAS, Prof Fadzil Abdul Rahman madahka program nya siti ari idea pelajar ke disukung penuh ulih universiti. “Aku berasai temegah ati meda pemanah sereta penyinu ke ditunjukka bala pelajar ke deka mantu raban ti kurang benasip tu.

“Tu siti ari pengawa ke manah sereta ibuhka orang, taja pan sida kiruh enggau tanggungjawap nyadi pelajar, tang tanggungjawap kena mantu orang ke kurang benasip endang enda jauh ari ati sida,” ku iya. Iya bejaku munyi nya maya Pengerami Nyerahka Bantu 1 Ringgit 1 Nation ba Restoran Rumah Universiti, Bangunan Chanselori UNIMAS ditu hari Satu tu tadi. Sama datai maya nya, Sapit Naib Chanselor Hal Ehwal Mahasiswa enggau Alumni UTM, Prof Dr Mohd Ismail Abdul Aziz sereta Pengarah Program 1 Ringgit 1 Nation UNIMAS, Nursyaheera Abu Bakar.

Tambah iya agi, program tu mega siti ari aktiviti kena meransang sereta ngukuhka perangai diri mahasiswa dalam aspek begulai enggau rayat. Serimbai enggau nya, Pengarah Program 1 Ringgit 1 Nation UTM, Faezah Faizal madahka enggau pengawa begulai enggau UNIMAS bisi RM30,000.00 udah digumpul. “Kira RM 20,000 udah diguna kami kena ngatur program tu, iya nya ngagihka 350 bungkus pemakai ngagai orang ke minta sedekah di Semenanjung Malaysia.

“Lalu lebih nya kami guna kena mantu raban peminta sedekah di Medan, Indonesia. Juluk ati kami sekali tu, deka ngagihka 400 bungkus pemakai ngagai raban sida nya,” ku iya. Ba pengerami nya, bisi RM 14,014.00 udah diserahkan gagai Sapit Naib Chanselor Hal Ehwal Pelajar enggau Alumni UNIMAS, Prof Fadzil Abdul Rahman ngagai Sapit Naib Chanselor Hal Ehwal Mahasiswa enggau Alumni UTM, Prof Dr Mohd Ismail Abdul Aziz.

Dipadahka bisi 20 iku pelajar ke nyengkaum pelajar UNIMAS enggau UTM deka nyereta misi ke Medan, Indonesia ari 24 ngagai 27 April tu ila. Lalu bisi 70 iku raban sukarela udah ngambi bagi ngemujurka program 1 Ringgit 1 Nation nya ngumpul pemeri aru setiap residential kolej, fakulti enggau pengatur pengawa universiti.

Sumber berita daripada Utusan Sarawak, klik di sini .

Gambar-gambar Majlis Penyerahan Sumbangan 1 Ringgit 1 Nation Peringkat UNIMAS, klik di sini .
Montaj 1 Ringgit 1 Nation, klik di sini .